Þýski handknattleiksþjálfarinn Stephan Swat var lagði inn á sjúkrahús fyrir helgina vegna veikinda eftir að hafa smitast af kórónuveirunni. Swat er þjálfari þýska 2. deildarliðsins EHV Aue sem tveir íslenskir handknattleiksmenn leika með, Arnar Birkir Hálfdánsson og Sveinbjörn Pétursson.
Óvíst er með öllu hversu lengi Swat verður frá störfum. Hann er 43 ára gamall hefur þjálfað Aue frá 2016 er hann tók við af Rúnari Sigtryggssyni. Meðan Swat verður frá störfum stýra Kirsten Weber, aðstoðarþjálfari og markvarðaþjálfarinn Michael Hilbig liðinu í leikjum og á æfingum.
Aue-liðið hefur orðið illa fyrir barðinu á veirunni og í tvígang hafa leikmenn þurft að fara í sóttkví. Sveinbjörn staðfesti í samtali við akureyri.net á dögunum að hafa veikst í október. Aue-liðið hefur verið í sóttkví upp á síðkastið. Vonir standa til að henni ljúki í vikunni og hægt verði að leika við Hüttenberg á laugardaginn.
