Þór hefur æfingar fyrir börn á Dalvík í haust

Handknattleiksdeild Þórs á Akureyri hefur ákveðið að byrja með handknattleiksæfingar á Dalvík í byrjun september. Í upphafi verða æfingarnar fyrir börn í fyrsta til sjötta bekk grunnskólans. Ef undirtektir verða góðar útilokar deildin ekki að efnt verði til æfinga fyrir þau sem eru í sjöunda til tíunda bekk.


Þór segir frá þessu á Facebooksíðu sinni og segir að um sé að ræða tilraun sem sem hafi orðið að samkomulagi á milli deildarinnar og æskulýðsfulltrúa Dalvíkurbyggðar.


Nýtt og afar gott íþróttahús er á Dalvík. Með því að hefja æfingar í handknattleik á Dalvík vilja forsvarsmenn Þórs og Dalvíkurbyggðar hleypa auknu lífi í íþróttlífið og bjóða börnum upp á að kynnast fleiri íþróttagreinum í heimabyggð. Hingað til hafa börn og unglingar frá Dalvíkurbyggð sótt æfingar til Akureyrar.


Það kemur fram í tilkynningu Þórs að hugmyndin að æfingunum á Dalvík hafi orðið til hjá Halldór Tryggvasyni yfirþjálfara yngri flokka félagsins Þórs sem jafnframt er aðstoðarþjálfari meistaraflokks.


Í upphafi er stefnt að því að allir sem vilji geti æft frítt. Þjálfararnir koma frá Þór auk þess sem deildin kemur með bolta til æfinganna en Dalvíkurbyggð útvegar aðstöðu til æfinganna.


Nánar má lesa um samstarf Þórs og Dalvíkurbyggðar á Facebooksíðu handknattleiksdeildar Þórs.

- Auglýsing -

Nýjustu fréttir

- Auglýsing -