Þórir Hergeirsson, þjálfari Evrópumeistara Noregs í handknattleik kvenna, er tilneyddur til þess að aflýsa tveimur fyrirhuguðum landsleikjum við Frakka sem fram áttu að fara í landsliðsvikunni eftir miðjan apríl. Ástæðan eru samkomutakmarkanir og harðar sóttvarnareglur sem gilda í Noregi og einnig að hluta til í Frakklandi.
Til stóð að þjóðirnar leiddu saman hesta sína í Noregi í tvígang upp úr miðjum apríl. Þegar ljóst var að það gengi ekki vegna sóttvarnareglna í Noregi, m.a. um 10 daga sóttkví allra þeirra sem heimsækja landið var reynt að koma leikjunum og æfingabúðunum á í Frakklandi. Eftir athuganir var niðurstaðan sú að ekki væri mögulegt að koma leikjunum við þar í landi.
Þórir segir niðurstöðuna vera bagalega þar sem norska landsliðið hafi þörf á að koma saman til æfinga og keppni. Huga þurfi að m.a. undirbúningi fyrir Ólympíuleikana sem fram fara í sumar. Hann segir ennfremur á heimasíðu norska handknattleikssambandsins að til standi að koma leikjunum við Frakka á dagskrá í sumar ef aðstæður leyfa.
