Handknattleiksmaðurinn Þorsteinn Gauti Hjálmarsson hefur ákveðið að ganga til liðs við Fram á nýjan leik eftir að yfirstandandi keppnistímabili verður lokið. Þorsteinn Gauti hefur undanfarnar tvær leiktíðir leikið með Aftureldingu. Þorsteinn hefur leikið yfir 100 meistaraflokksleiki fyrir Fram og skoraði m.a. 123 mörk í 22 leikjum Fram-liðsins leiktíðina 2018/2019. Samningur hans við Safamýrarliðið er til næstu tveggja ára.
Handknattleiksdeild Fram greinir frá tíðindunum í kvöld.
„Það er mikið ánægjuefni að fá Þorstein Gauta aftur til Fram. Hann er fjölhæfur leikmaður og drengur góður sem mun styrkja hópinn jafnt innan vallar sem utan,” segir Bjarni Kristinn Eysteinsson í fyrrgreindri yfirlýsingu.
Meiðsli hafa sett strik í reikninginn hjá Þorsteini Gauta nær allt þetta keppnistímabil og komið í veg fyrir að hann hafi sýnt allar sínar bestu hliðar.
