Haukamaðurinn Kristófer Máni Jónasson leikur með Aftureldingu á næstunni. Mynd/Haukar

Handknattleiksdeild Hauka hefur lánað Kristófer Mána Jónasson tímabundið til Aftureldingar. Þetta kemur fram í tilkynningu frá handknattleiksdeild Hauka í kvöld. Kristófer Máni er þriðji leikmaðurinn sem Haukar lána til Aftureldingar fyrir komandi leiktíð.


Í síðustu viku var greint frá því að Guðmundur Bragi Ástþórsson hafi verið lánaður til Mosfellinga og í sumar náðist samkomulag um að markvörðurinn, Andri Sigmarsson Scheving, léki með Aftureldingu allt keppnistímabilið 2021/2022.


Kristófer, sem er 19 ára á árinu hefur verið einn af hægri hornamönnum meistaraflokks Haukar undanfarin ár, jafnt í A-liðinu sem og U-liðinu í Grill66-deildinni. Kristófer Máni lék með U19 ára landsliðinu á EM í Króatíu á dögunum.

Bróðir Kristófers Mána, Halldór Ingi, lék nokkra leiki með Aftureldingu snemma á síðasta keppnistímabili sem lánsmaður frá Haukum.


„Afturelding hefur verið í miklum meiðsla vandræðum hjá leikmönnum sínum og óskuðu þeir eftir að fá Kristófer Mána lánaðan. Haukar hafa orðið við þeirri beiðni og verður Kristófer á láni hjá Aftureldingu tímabundið. Haukar óska Kristófer góðs gengis í Mosfellsbænum þar sem hann fær nú dýrmæta reynslu og hlakka til að fá hann aftur reynslunni ríkari,“ segir m.a. í tilkynningu handknattleiksdeildar Hauka í kvöld.

- Auglýsing -

Nýjustu fréttir

- Auglýsing -