- Auglýsing -

Þríeykið mátti sætta sig við skiptan hlut

Sveinbjörn Pétursson, markvörður. Mynd/EHV/Aue

Íslendingaliðið EHV Aue, sem Rúnar Sigtryggsson tók tímabundið við þjálfun á í vikunni, varð að sætta sig við jafntefli á heimavelli í kvöld gegn Grosswallstadt í þýsku 2. deildinni í handknattleik, 27:27. Gabriel De Santis jafnaði metin fyrir Aue þegar tíu sekúndur voru til leiksloka. Sveinbjörn Pétursson, markvörður Aue, sá til þess á síðustu sekúndu að bjarga öðru stiginu þegar hann varði lokaskot leikmanna Grosswallstadt á markið.
Þetta var annar leikur Aue undir stjórn Rúnars en í fyrsta leiknum á þriðjudagskvöld vann Aue liðsmenn Eisenach, 30:25.

Aue var með fimm marka forskot í hálfleik, 17:12, og var með yfirhöndina, þrjú til fjögur mörk, allt fram í miðjan síðari hálfleik þegar leikmönnum Grosswallstadt tókst að snúa við taflinu og komst yfir undir lokin.

Sveinbjörn er greinilega mjög ánægður að sjá Rúnar því annan leikinn stóð hann svo sannarlega fyrir sínu. Sveinbjörn varði 14 skot, þar af tvö vítaköst, og var hlutfallsmarkvörslu upp á 36%.

Arnar Birkir Hálfdánsson skoraði þrjú mörk í átta tilraunum.

Aue situr í sjötta sæti með 10 stig að loknum sjö leikjum. Grosswallstadt er í 12. sæti með níu stig. Mjótt er á munum milli liðanna í deildinni sem hafan leikið misjafnlega marga leiki. Gummersbach, undir stjórn Guðjóns Vals Sigurðssonar er sem fyrr efst með 16 stig í níu leikjum. HSV Hamburg er næst á eftir með 14 stig. Gummersbach lék ekki í kvöld en sækir Elbflorenz heim á sunnudag.

- Auglýsing -
- Auglýsing -

Nýjustu fréttir

- Auglýsing -