Þýskaland: Daníel Þór – Elvar, Arnar, Alexander, Guðmundur

Daníel Þór Ingason. Mynd/Balingen-Weilstetten
  • Daníel Þór Ingason fagnaði sínum fyrsta sigri í þýsku 1. deildinni í handknattleik í gærkvöld þegar lið hans Balingen-Weilstetten lagði GWD Minden á heimavelli, 27:21, þegar önnur umferð deildarinnar hófst. Þetta var jafnframt fyrsti heimaleikur Balingen-liðsins á leiktíðinni en það tapaði fyrir meisturum Kiel á útivelli í fyrstu umferð.
  • Daníel Þór, sem gekk til liðs við Balingen-Weilstetten í sumar frá Ribe-Esbjerg, tók mikið þátt í varnarleiknum og stóð sig afar vel. Hann var hinsvegar minna með í sókninni en átti þó eitt markskot sem geigaði.
  • Oddur Gretarsson var ekki í liði Balingen-Weilstetten. Eins og kom fram á handbolta.is á dögunum leikur Oddur ekki með liðinu fyrr en í fyrsta lagi undir árslok. Hann er í strangri endurhæfingu eftir að hafa gengist undir aðgerð á hné í sumar.
  • Elvar Örn Jónsson virðist falla vel inn í þýska handknattleikinn eftir að hafa gengið til liðs við MT Melsungen í sumar. Elvar lék afar vel í gær á heimavelli gegn meisturum THW Kiel. Hann skoraði fimm mörk í átta skotum og átti sjö stoðsendingar. Til viðbótar var Elvar Örn öflugur í vörninni.
  • Arnar Freyr Arnarsson skoraði tvö mörk í tveimur skotum fyrir Melsungen og lét einnig til sín taka í vörninni eins og Alexander Petersson sem skoraði eitt mark í tveimur skotum auk einnar stoðsendingar.
  • Melsungen, liðið sem Guðmundur Þórður Guðmundsson þjálfar, tapaði leiknum. 33:26.
  • Flensburg tapaði óvænt stigi í þýsku 1. deildinni í gær þegar liðið gerði jafntefli við HC Erlangen, 27:27. Um er að ræða fyrsta stigið sem Erlangenliðð krækir í á heimavelli Flensburg. Sænski handknattleiksmaðurinn Hampus Wanne meiddist á kálfa og leikur væntanlega ekki með Flensburg á næstunni af þeim sökum.
  • Fimm leikir verða á dagskrá þýsku 1. deildarinnar í dag:
    RN-Löwen – Magdeburg.
    Leipzig – Füchse Berlin.
    Wetzlar – Lemgo.
    Göppingen – Lübbecke.
    Bergischer HC – HSV Hamburg.
- Auglýsing -

Nýjustu fréttir

- Auglýsing -