Ásbjörn Friðriksson var allt í öllu í FH-liðinu á Akureyri í kvöld. Mynd/Raggi Óla

Aftureldingarmenn drógust gegn Granitas-Karys frá Litháen í aðra umferð Evrópubikarsins í handknattleik karla og Valur mætir spænska liðinu Rincon Fertilidad Málaga í annarri umferð sömu keppni í kvennaflokki. Dregið var á þriðjudaginn.

FH er einnig skráð til þátttöku í keppninni í karlaflokki en bætist ekki í hópinn fyrr en í þriðju umferðinni sem til stendur að fari fram í desember. Sömu sögu er að segja um kvennalið Þórs/KA sem mætir til leiks í þriðju umferð sem reiknað er með að verði leikin í nóvember.

Afturelding á fyrri leikinn á heimavelli 14. eða 15. nóvember gegn Granitas-Karys. Ráðgert er að síðari leikurinn fari fram ytra viku síðar. Lið Granitas-Karys þekkja e.t.v. handboltaáhugamenn hér á landi frekar undir heitinu Granitas Kaunas en liðið hefur um árabil verið eitt allra fremsta handknattleikslið Litháen.

Önnur umferð Evrópubikarkeppninnar í kvennaflokki er ekki ráðgerð fyrr en í október. Fyrri leikurinn á að fara fram á heimavelli Rincon Fertilidad Málaga helgina 14. og 15. október og sá síðari í Origo-höllinni á Hlíðarenda 21. eða 22. október. Málaga-liðið var í 5. sæti efstu deildar á Spáni þegar keppni var slaufað í mars.

Evrópubikarinn leysir af hólmi Áskorendakeppni Evrópu sem íslensk félagslið hafa tekið þátt í á undanförnum árum m.a. Valur og ÍBV en bæði féllu úr keppni í undanúrslitum fyrir sama liðinu, Potaissa Turda frá Rúmeníu, annarsvegar vorið 2018 og hinsvegar 2019.

Engin önnur svokölluð Íslendingalið, þ.e. félagslið sem íslenskir handknattleiksmenn leika með á erlendri grund, voru í pottunum sem hrært var í og dregið úr að þessu sinni á skrifstofu Handknattleikssambands Evrópu, EHF.

- Auglýsing -

Nýjustu fréttir

- Auglýsing -