- Auglýsing -

Tinna stendur á milli stanganna hjá Gróttu

Gunnar Gunnarsson þjálfari Gróttu ásamt Tinnu Húnbjörgu Einarsdóttur markverði. Mynd/Grótta

Tinna Húnbjörg Einarsdóttir, markvörður, hefur gengið til liðs við Gróttu í Grill66-deildinni. Hún er 28 ára gömul og er þrautreynd í markinu. Síðustu tvö ár hefur Tinna leikið með Stjörnunni en var þar áður hjá Haukum.


Tinnu er ætlað að fylla skarðið sem Soffía Steingrímsdóttir markvörður skildi eftir þegar hún gekk til liðs við Fram.


„Tinna kemur með mikla reynslu, gæði og keppnisskap inn í hópinn sem á eftir að reynast okkur vel. Það er gott fyrir ungu markmennina hjá okkur að fá svona reynslubolta með sér. Þar fyrir utan er hún sterkur persónuleiki sem gefur mikið af sér og leggur sig alltaf 100% fram í æfingar og leiki,“ sagði Gunnar Gunnarsson þjálfari Gróttuliðsins í tilkynningu frá handknattleiksdeild Gróttu.

Talsverður liðsauki

Tinna er ekki eini liðsstyrkurinn sem Grótta hefur fengið fyrir keppnistímabilið í Grill66-deildinni sem hefst á föstudaginn. Auk Tinnu má nefna Þóru Maríu Sigurjónsdóttur frá HK, Margréti Björg Castillo frá Fram, Ídu Margréti Stefánsdóttur og Signýju Pálu Pálsdóttur frá Val. Tvær þær síðarnefndu er á láni frá Val. Einnig varð breyting á þjálfarateymi liðsins með komu Gunnars Gunnarssonar og Sigríðar Unnar Jónsdóttur.


Flautað verður til leiks í Grill66-deild kvenna á föstudaginn með þremur leikjum. Grótta fær ungmennalið Vals í heimsókn, Víkingur tekur á móti Fjölni/Fylki og ÍR leikur við HK U í íþróttahúsinu í Skógarseli.

handbolti.is nýtur ekki opin­bers rekstr­­ar­­stuðn­­ings.
- Auglýsing -
- Auglýsing -

Nýjustu fréttir

- Auglýsing -