Tíu markalausar mínútur hjá ÍR og Afturelding er efst

Einar Ingi Hrafnsson verður frá keppni um nokkurt skeið. Mynd/Raggi Óla

Tíu mínútna kafli hjá ÍR á síðasta stundarfjórðungi leiksins við Aftureldingu í kvöld reyndist ÍR-liðinu dýr er liðin mættust í Olísdeild karla í handknattleik í Austurbergi í kvöld. Þar með misstu leikmenn ÍR jafnan leik úr höndum sér. Leikmenn Aftureldingar létu ekki bjóða sér slíkt tækifæri tvisvar og skoruðu fimm mörk á þeim kafla. Breyttu þeir stöðunni úr 18:18, í 23:18. Þar með lagði Afturelding grunn að fimm marka sigri, 27:22.


Staðan var jöfn, 11:11, að loknum fyrri hálfleik og segja má að viðureignin hafi verið í járnum þar til markaþurrð varð í herbúðum ÍR-liðsins sem reka enn lestina án stiga eftir níu umferðir. Aftureldingarmenn eru hinsvegar í góðu málum í efsta sæti deildarinnar með 13 stig eftir níu leiki. Þeir eru stigi á undan Haukum sem eiga tvo leiki til góða á Mosfellinga.


Arnór Freyr Stefánsson átti afar góðan leik í marki Aftureldingar eins og gegn Stjörnunni á fimmtudagskvöldi.


Mörk ÍR: Gunnar Valdimar Johnsen 5, Viktor Sigurðsson 5, Sveinn Brynjar Agnarsson 5, Andri Heimir Friðriksson 4, Eggert Sveinn Jóhannsson 2, Ólafur Atli Malmquist 1.
Mörk Aftureldingar: Þorsteinn Leó Gunnarsson 5, Einar Ingi Hrafnsson 4, Gunnar Kristinn Malmquist 4, Guðmundur Bragi Ástþórsson 3, Guðmundur Árni Ólafsson 3, Hafsteinn Óli Ramos Rocha 3, Blær Hinriksson 3, Þrándur Gíslason Roth 2.

- Auglýsing -

Nýjustu fréttir

- Auglýsing -