Aron Pálmarsson. Mynd/Barcelona

Leikmenn handknattleikslið Barcelona og BM Nava tóku daginn snemma í dag og mættu til leiks í íþróttahöll Katalóníuliðsins fyrir hádegið. Þar með hófst þriðja umferð spænsku 1. deildarinnar sem lýkur síðdegis.

Barcelona ber höfuð og herðar yfir önnur lið deildarinnar um þessar mundir. Það var undirstrikað enn einu sinni í leiknum áðan sem Barcelona vann með 17 marka mun, 39:22, aðeins hálfum öðrum sólarhring eftir að liðið lék gegn Motor í Meistaradeild Evrópu í Úkraínu.

Aron Pálmarsson skoraði eitt mark fyrir Barcelonaliðið sem náði að dreifa álaginu sem fyrr afar vel á milli leikmanna. Staðan að loknum fyrri hálfleik var 20:12.

Danski hornamaðurinn Casper Mortensen var markahæstur leikmanna Barcelona. Hann skoraði átta sinnum. Mamadou Lamine Diocou og Luis Diogo Da Sousa Frade skoruðu fimm mörk hvor.

Danski markvörðurinn Kevin Möller lék allan tímann í marki Barcelona en alla jafna er hann varaskeifa fyrir spænska landsliðsmarkvörðinn Gonzalo Perez de Vargas sem átti náðugan dag á varamannbekknum.

Litháinn Lukas Simenas skoraði fimm mörk fyrir gestina og var markahæstur þeirra.

- Auglýsing -

Nýjustu fréttir

- Auglýsing -