Treystu stöðu sína

Sandra Erlingsdóttir leikmaður EH Aalborg. Mynd/EH Aalborg Support

EH Aalborg, liðið sem Sandra Erlingsdóttir leikur með í dönsku B-deildinni í handknattleik, treysti stöðu sína í öðru sæti deildarinnar fyrir lokaumferðina með tveggja marka sigri á Hadsten, 29:27, á heimavelli í dag. Sigurinn var öruggari en tölurnar gefa til kynna því leikmenn Hadsten skoruðu tvö síðustu mörk leiksins á lokamínútunni.


Sandra og félagar voru sterkari lengst af leiksins. Eftir að hafa verið með tveggja marka forskot í hálfleik, 15:13, þá var munurinn kominn upp í sex mörk eftir um tíu mínútur í síðari hálfleik, 20:14. Vörn og markvarsla á þeim tíma lagði grunn að góðu forskoti Álaborgarliðsins sem var með yfirhöndina, þrjú til fimm mörk, þar til í blálokin.


Sandra skoraði tvö mörk í dag.


EH Aalborg er með 34 stig eftir 21 leik og er stigi á eftir Ringköbing sem er efst og á leik til góða á móti Rödovre á sunnudaginn. SönderjyskE er í þriðja sæti með 28 stig eftir 20 leiki. Hadsten er sem stendur í fjórða sæti.

Efsta liðið fer beint upp í úrvalsdeild en þau sem hafna í öðru og þriðja sæti fara í umspil um sæti í úrvalsdeild gegn liðum úr úrvalsdeildinni.

- Auglýsing -

Nýjustu fréttir

- Auglýsing -