- Auglýsing -
Tumi Steinn Rúnarsson stimplaði sig hressilega til leiks í fyrsta leik sínum með HSC Coburg í þýsku 2. deildinni í handknattleik í gær. Hann skoraði sjö mörk úr jafnmörgum tilraunum fyrir liðið er það vann TV Emsdetten með níu marka mun, 34:25, á heimavelli. Þrjú marka sinna skoraði Tumi Steinn úr vítaköstum.
Til viðbótar átti Tumi Steinn þrjár stoðsendingar. Hann gekk óvænt til liðs við félagið um miðjan janúar.
Emsdetten var marki yfir í hálfleik, 14:13. Leikmenn liðsins fengu hinsvegar ekki rönd við reist þegar Tumi Steinn og félagar sneru við taflinu í síðari hálfleik. Tumi Steinn átti mikinn þátt í viðsnúningnum en hann skoraði sex af sjö mörkum sínum í síðari hálfleik.
Fyrrverandi samherji Tuma Steins í Íslandsmeistaraliði Vals á síðasta vori, Anton Rúnarsson, var fjarri góðu gamni og lék ekki með TV Emsdetten að þessu sinni.
HSC Coburg er í 13. sæti af 20 liðum deildarinnar. TV Emsdetten er þremur sætum neðar.
Staðan:
Standings provided by SofaScore LiveScore
- Auglýsing -
