Tveir leikmennn FH, Phil Döhler markvörður, og leikstjórnandinn Ásbjörn Friðriksson eru í liði desembermánaðar í Olísdeild karla hjá tölfræðiveitunni HBStatz sem valið hefur úrvalslið í hverjum mánuði sem liðinn er af núverandi keppnistímabili.
Liðið er sett saman eftir gögnum sem aflað er með því að skrá niður ýmsa tölfræðiþætti í hverjum kappleik deildarinnar.
Aðrir í liði mánaðarins eru; Vignir Stefánsson, hornamaður Vals, Róbert Sigurðarson línumaður ÍBV sem er reyndar fyrst og fremst einn vaskasti varnarmaður Eyjaliðsins, Einar Bragi Aðalsteinsson, stórskytta úr HK, Einar Rafn Eiðsson, KA, og hornamaðurinn Leó Snær Pétursson úr Stjörnunni.
Jóhannes Berg Andrason, Víkingi, og Óðinn Þór Ríkharðsson, KA, eru varamenn liðsins.
HK-ingurinn Einar Bragi var einnig valinn leikmaður mánaðarins samkvæmt tölfræði HBStatz.
