Tveir í bann – ekki vítaverð eða hættuleg framkoma

Tveir leikmenn Vals í Olísdeild karla verða að súpa seyðið af framkomu sinni í viðureign KA og Vals í KA-heimilinu í síðustu viku. Það er alltént niðurstaða aganefndar HSÍ sem birtur var eftir fund nefndarinnar í dag. Anton Rúnarsson og Stiven Tobar Valencia voru úrskurðaðir í eins leiks bann vegna óíþróttamannslegrar framkomu. Þeir verða þar með fjarri góðu gamni þegar Valur tekur á móti FH í 12. umferð Olísdeildar á mánudagskvöld.

Aganefnd tók upp þráðinn þar sem frá var horfið í máli ábyrgðarmanns á viðureign ÍBV og KA á dögunum en fjallað var um það á fundi aganefndar fyrir viku. Í leiknum mun ábyrgðamaður hafa veist að dómurunum. Eftir að hafa farið ofan í kjölin á málinu er það mat nefndarinnar að „varhugavert sé að slá því föstu, eins og málið liggur fyrir, að framkoman geti talist vítaverð eða hættuleg gagnvart dómurum leiksins.“

Niðurstaða aganefndar HSÍ:

  • Stiven Tobar Valencia leikmaður Vals hlaut útilokun með skýrslu vegna óíþróttamannslegrar hegðunar í leik KA og Vals í Olís deild karla þann 18.2.2021. Dómarar meta að brotið falli undir reglu 8:10 a).  Með tilvísun í 10. gr. reglugerðar HSÍ um agamál er það niðurstaða aganefndar að leikmaðurinn er úrskurðaður í eins leiks bann. Aganefnd vekur jafnframt athygli á stighækkandi áhrifum leikbanna, skv. 1. mgr. 11. gr. sömu reglugerðar.
  • Anton Rúnarsson leikmaður Vals hlaut útilokun með skýrslu vegna óíþróttamannslegrar hegðunar í leik KA og Vals í Olís deild karla þann 18.2.2021. Dómarar meta að brotið falli undir reglu 8:10 a). Með tilvísun í 10. gr. reglugerðar HSÍ um agamál er það niðurstaða aganefndar að leikmaðurinn er úrskurðaður í eins leiks bann. Aganefnd vekur jafnframt athygli á stighækkandi áhrifum leikbanna, skv. 1. mgr. 11. gr. sömu reglugerðar.
  • Í skýrslu dómara eftir leik ÍBV – KA í Olís deild karla þann 15.02.2021 kemur fram að ábyrgðarmaður leiks hafi veist að dómurum eftir leik. Í samræmi við 4. mgr. 17. gr. reglugerðar HSÍ um agamál var ÍBV gefinn kostur á að skila inn umsögn vegna málsins.
    Samkvæmt 17. gr. fyrrnefndrar reglugerðar er aganefnd heimilt að sekta félög ef áhorfendur, þar með taldir forystumenn félaga, gerast sekir um vítaverða eða hættulega framkomu gagnvart m.a. dómurum leiks. Þó að framganga ábyrgðarmannsins hafi sannarlega verið ámælisverð er að mati nefndarinnar varhugavert að slá því föstu, eins og málið liggur fyrir, að framkoman geti talist vítaverð eða hættuleg gagnvart dómurum leiksins, í skilningi 17. gr. reglugerðar HSÍ um agamál. Er því niðurstaða nefndarinnar að ekki skuli aðhafst frekar í málinu.
- Auglýsing -

Nýjustu fréttir

Annar þjálfari Þórs er hættur

Þorvaldur Sigurðsson er hættur þjálfun karlaliðs Þórs á Akureyri en liðið leikur í Olísdeildinni. Frá þessu er greint á heimasíðu Þórs. Halldór...

Molakaffi: Sigur hjá Daníel Frey, Porto tekur númer 1 úr umferð, naumt tap

Daníel Freyr Andrésson varði 8 skot og var með 33 % markvörslu þann tíma sem hann stóð í marki Guif í gærkvöld...

Harðarmenn gáfu Kríunni ekkert eftir

Leikmönnum Harðar á Ísafirði vex fiskur um hrygg með hverjum leiknum sem þeir leika í Grill 66-deild karla í handknattleik. Þeir hafa...
- Auglýsing -