Ummælum Valsmanns vísað til aganefndar

Mynd/ J.L.Long

Framkvæmdastjóri HSÍ hefur fyrir hönd stjórnar sent erindi til aganefndar vegna ummæla leikmanns Vals eftir leik Vals og Fram í úrslitakeppni Olísdeildar karla sem fram fór í gær. Þetta kemur fram í fundargerð aganefndar HSÍ sem birt var síðdegis.


Ekki er tekið fram í fundargerðinni um hvaða leikmann er að ræða sem á að hafa látið falla þau orð sem ástæða þykir að vísa til aganefndar.

Samkvæmt heimildum handbolta.is mun vera um að ræða einhvern hluta þess sem Björgvin Páll Gústavsson markvörður Vals sagði í samtali við mbl.is eftir viðureign liðanna í gærkvöld. Þar gaf Björgvin m.a. í skyn að leikmenn Fram hafi viljandi skotið í höfuðið á honum.


„Annaðhvort gera þeir þetta vilj­andi eða eru svona lé­leg­ir. Ég veit að þeir eru góðir hand­bolta­menn, svo það hlýt­ur að vera það fyrra,“ sagði Björgvin Páll í samtali við mbl.is.


Handknattleiksdeild Vals hefur frest til þess að skila inn greinargerð vegna málsins en aganefnd fundar daglega sé því að skipta meðan á úrslitakeppninni stendur.


Þorsteinn Gauti Hjálmarsson, Fram, Arnór Snær Óskarsson, Val, og Dagur Arnarsson, ÍBV, sem voru útilokaðir með skýrslu í leikjum átta liða úrslitanna í gærkvöld fara ekki í leikbann. Þeir eru minntir á stighækkandi áhrifum útilokana vegna slíkra brota.

Úrskurð aganefndar HSÍ í dag er að finna hér.

- Auglýsing -

Nýjustu fréttir

- Auglýsing -