Gummersbach, sem Guðjón Valur Sigurðsson þjálfar, komst að minnsta kosti um stund upp í annað sæti þýsku 2. deildarinnar í dag þegar liðið vann Ferndorf, 30:28, á heimavelli. Gummersbach komst þar með stigi upp fyrir N-Lübbecke sem sat í öðru sæti deildarinnar. Óvíst er hinsvegar hvort Gummersbach haldi stöðu sinni lengi þar sem N-Lübbecke leikur síðar í dag við neðsta lið deildarinnar, Fürsetenfeldbruck.
Gummersbach var með yfirhöndina í leiknum við Ferndorf í dag frá upphafi til enda og hafði m.a. þriggja marka forskot að loknum fyrri hálfleik, 16:13. Ferndorf-mönnum tókst að minnka muninn í eitt marka í síðari hálfleik. Nær komust þeir ekki.
Elliði Snær Viðarsson lék annan leik sinn í röð fyrir Gummersbach eftir að hafa jafnað sig af meiðslum. Hann skoraði ekki mark og kom lítið við sögu í sóknarleiknum. Eyjamaðurinn var hinsvegar baráttuglaður í vörninni að vanda og var m.a. einu sinni vísað af leikvelli í tvær mínútur.
Viðureign Hamm-Westfalen og Bietigheim, sem Aron Rafn Eðvarðsson leikur með, var frestað en kórónuveiran hefur gert mönnum hjá Hamm-Westfalen grammt í geði síðustu daga.
