Mynd/Kjartan Vídó Ólafsson
  • Eins og greint var frá í gær þá verður ekkert leikið á Íslandsmótinu í handknattleik næstu vikurnar eftir að hertar samkomutakmarkanir tóku gildi á miðnætti. Einnig er óheimilt að stunda æfingar.
  • Róbert Geir Gíslason, framkvæmdastjóri Handknattleikssambands Íslands, sagði í samtali við handbolta.is í gær að hann ali þá von í brjósti að undanþága verði veitt til æfinga afrekshópa með ströngum skilyrðum, þ.e. meistaraflokka, líkt og gert var í desember og fram í janúar. Hvort sú von rætist skýrist fljótlega eftir að reglugerð heilbrigðisráðuneytisins tekur gildi og vegna breytinganna sem tóku gildi á miðnætti.
  • Af samtölum handbolta.is við fólk innan handboltahreyfingarinnar í gær virtist ljóst að ef ekki fæst undanþága til æfinga meistaraflokka þá hefst Íslandsmótið ekki á ný fyrr en um mánaðamótin apríl og maí. Gefa verði alltént tvær vikur til æfinga eftir algjört hlé frá handboltaæfingum.
  • Allt miðast þetta við að takmörkunum verði létt 15. apríl. Eins og fyrri daginn er ómögulegt að segja til um hvort svo verði því hingað til hafa skrefin til baka verið fá og smá. Sennilegt er að þær reglur sem giltu 23. mars verði ekki samhjóða þeim sem taka gildi 15. apríl. Við því má búast.
  • Of snemmt er að fullyrða hvaða áhrif hertar takmarkanir á framhald Íslandsmótins hafa og hvað þá bikarkeppnina sem er nærri því öll eftir óleikin. Sjö umferðir eru eftir í Olísdeild karla. Þeim verður ekki rumpað af. Síðan bætast við landsleikir karla og kvenna eftir miðjan apríl og fram í byrjun maí.
  • Þegar loks verður búið að ljúka keppni í deildunum fjórum á Íslandsmótinu, þar sem langmest er eftir af leikjum í Olísdeild karla, þarf að taka ákvörðun um hvort blásið verður til úrslitakeppni og ef þá hvort hana verði ekki að skera niður.
    Einnig er eftir umspil um flutning á milli deilda. Og síðast en ekki síst blessuð bikarkeppnin.
  • Þar á ofan verða forsvarsmenn félaganna og stjórnendur HSÍ að spyrja sig að því hvort þeir vilja standa fyrir öllum þessum kappleikjum fyrir luktum dyrum eða með mjög fáum áhorfendum.
  • Þetta þarf allt að skoða vegna þess að það er engin trygging fyrir að bölvuð veiran hafi yfirgefið samfélagið eftir mánuð, tvo að þrjá. Ekkert frekar en þegar við vonuðumst eftir um síðustu páska að það yrði fyrstu og einu páskar lífs okkar þar sem við ferðuðumst innanhúss, tókum undir í söngnum um að „þetta er tækifæri af allra bestu gerð“, að rétt væri að nota það til fara í ilmolíubað milli þess sem legið væri í tjaldi úti bílskúr og sungið um að þetta væri „upplifun af sérstökustu gerð.“
  • Það sem einu sinni hefur gerst getur átt sér stað aftur.

    Ívar Benediktsson, [email protected]
- Auglýsing -

Nýjustu fréttir

- Auglýsing -