Íslandsmeistarar Vals lögðu af stað frá landinu í morgun. Ferð þeirra er heitið til Króatíu þar sem þeirra bíða tveir leikir í 1. umferð Evrópudeildarinnar gegn RK Porec um helginga. Fyrri viðureignin verður klukkan 17 á föstudaginn og sú síðari daginn eftir klukkan 16.
Japanski landsliðsmarkvörðurinn Motoki Sakai, sem samdi við Val í sumar, fékk leikheimild í gærkvöld og fór með liðinu út í morgun. Að öðru leyti verður Valsliðið skipað sömu leikmönnum og tóku þátt í viðureigninni við Hauka í meistarakeppni HSÍ í gærkvöld. Róbert Aron Hotert, Vignir Stefánsson og Stiven Tobar Valencia verða fjarri góðu gamni.
RK Porec var eitt sex liða í króatísku úrvalsdeildinni í handknattleik á síðustu leiktíð. Bækistöðvarnar eru í strandbænum Porec á vesturströnd Króatíu. Eftir því sem næst verður komist var RK Porec í þriðja sæti í króatísku úrvalsdeildinni þegar keppni var slaufað í vor vegna kórónuveirunnar og ekkert varð úr að krýndir væri meistari. Talsverðar breytingar urðu á leikmannahópi RK Porec í sumar.
RK Porec hefur öðru hverju í tekið þátt í Evrópukeppni félagsliða. Síðast var liðið með haustið 2019 og vann hollenska liðið Volendam í fyrstu umferð Evrópubikarkeppninnar en steinlá fyrir franska liðinu PAUC í annarri umferð.
Keppnishöll félagsins rúmar 1.400 manns í sæti.
Keppni hefst í króatísku úrvalsdeildinni laugardaginn 11. september. RK Zagreb hefur borið höfuð og herðar yfir önnur lið í króatískum handknattleik. Yfirburðir liðsins hafa verið slíkir að það er eina liðið sem hefur unnið meistaratitilinn frá því að fyrst var leikið um hann keppnistímabilið 1991/1992.
Nexe hefur verið annað besta lið Króatíu. Önnur hafa staðið Zagreb og Nexe nokkuð að baki.
