Leikmenn Gróttu hófu keppnistímabilið í Olísdeildinni á sama hátt og þeir gerðu fyrir ári, þ.e. næstum því með jafntefli gegn liðinu sem flestir spá að standi upp sem sigurvegari í deildinni næsta vor. Í fyrra voru það leikmenn Hauka sem sluppu með skrekkinn í Hertzhöllinni í fyrstu umferð og fór heim með eins marks sigur. Í kvöld voru það Íslandsmeistarar Vals sem máttu þakka fyrir að fara með bæði stigin í farteskinu frá Seltjarnarnesi.
Björgvin Páll Gústavsson sá til þess þegar hann varði síðasta skot Gróttumanna að markinu rétt áður en leiktíminn var úti, lokatölur, 22:21, fyrir Íslandsmeistarana.
Leikurinn var hnífjafn frá upphafi til enda og mátti vart á milli sjá hvort liðið þykir líklegt til þess að verða í toppbaráttu en leikmönnum Gróttu er ekki spáð frægð og frama á komandi mánuðum. Þeir sendu allar spár til föðurhúsana að þessu sinni.
Mörk Gróttu: Brigir Steinn Jónsson 6, Ólafur Brim Stefánsson 4, Hannes Grimm 4, Sveinn Brynjar Agnarsson 3, Andri Þór Helgason 2/1, Ívar Logi Styrmisson 1, Ágúst Emil Grétarsson 1.
Varin skot: Einar Baldvin Baldvinsson 14, 38,9%.
Mörk Vals: Róbert Aron Hostert 5, Benedikt Gunnar Óskarsson 3, Finnur Ingi Stefánsson 3, Þorgeir Bjarki Davíðsson 2, Tryggvi Garðar Jónsson 2, Þorgils Jón Svölu Baldursson 2, Arnór Snær Óskarsson 2, Tumi Steinn Rúnarsson 2, Vignir Stefánsson 1.
Varin skot: Björgvin Páll Gústavsson 13, 38,2%.
Öll tölfræði leiksins er hjá HBStatz.
