Handknattleikssamband Evrópu, EHF, staðfesti í morgun þátttöku Vals, KA/Þórs og ÍBV í Evrópubikarkeppni kvenna á næsta keppnistímabili. Liðin þrjú hefja þátttöku í fyrstu umferð keppninnar.
Dregið verður til fyrstu umferðar þriðjudaginn 19. júlí. Valur verður í efri styrkleikaflokki þegar dregið verður en KA/Þór og ÍBV í þeim neðri. Þar af leiðandi er ekki hægt að Valur geti dregist gegn öðru hvoru íslensku liðanna í neðri flokknum.
Leikdagar hafa verið ákveðnir helgarnar 8. og 9. október annarsvegar og 15. og 16. október hinsvegar.
Alls eru 59 lið skráð til leiks í Evrópubikarkeppni kvenna. Af þeim verða nöfn 54 liða í pottunum þegar dregið verður úr tveimur styrkleikaflokkum. Fimm lið sitja yfir í fyrstu umferð en mæta til leiks í aðra umferð keppninnar sem á að fara fram í fyrri hluta desember.
ÍBV komst alla leið í átta liða úrslit Evrópubikarkeppninnar á síðasta keppnistímabili.
Nánar er hægt að sjá hér styrkleikaflokkana fyrir fyrstu umferð keppninnar og hugsanlega mótherja íslensku liðanna.
Fjögur karlalið verða með
EHF mun á næstu dögum staðfesta skráningu liða til keppni í Evrópudeild karla og í Evrópubikarkeppni karla. Eftir því sem handbolti.is kemst næst sóttu Valur, KA, Haukar og ÍBV um þátttöku í Evrópmótum félagsliða.
