Fram er úr leik í keppninni um Íslandsmeistaratitilinn í handknattleik kvenna eftir annað tap fyrir Val í undanúrslitarimmu liðanna, 24:19, í Origohöllinni í kvöld. Valur mætir annað hvort deildarmeisturum KA/Þórs eða ÍBV í úrslitum um Íslandsmeistaratitilinn. KA/Þór og ÍBV mætast í oddaleik á laugardaginn í KA-heimilinu.
Valur var tveimur mörkum yfir í hálfleik, 9:7, eftir að hafa skorað fimm mörk í röð gegn engu frá Fram á síðustu tíu mínútum fyrri hálfleiks. Framliðið var skrefi á eftir og vel það allan síðari hálfleikinn. Vörn Vals var frábær, eins og í fyrri viðureign liðanna á laugardaginn í Framhúsinu. Framliðið náði aldrei að leysa varnarleikinn til hlítar og því fór sem fór.
Valsliðið var með fjögurra til sex marka forystu allan síðari hálfleikinn og vann sanngjarnan sigur.
Saga Sif Gíslasdóttir átti stórleik í marki Vals og varði alls 13 skot.
Mörk Vals: Lovísa Thompson 8/1, Thea Imani Sturludóttir 5, Auður Ester Gestsdóttir 3, Anna Úrsúla Guðmundsdóttir 3, Mariam Eradze 2, Hanna Karen Ólafsdóttir 2, Elín Rósa Magnúsdóttir 1.
Varin skot: Saga Sif Gíslasdóttir 13, 41,9%.
Mörk Fram: Lena Margrét Valdimarsdóttir 4, Unnur Ómarsdóttir 3, Karen Knútsdóttir 3, Þórey Rósa Stefánsdóttir 2, Ragnheiður Júlíusdóttir 2, Hildur Þorgeirsdóttir 1, Stella Sigurðardóttir 1, Jónína Hlín Hansdóttir 1, Guðrún Erla Bjarnadóttir 1, Harpa María Friðgeirsdóttir 1.
Varin skot: Katrín Ósk Magnúsdóttir 5, 29,4% – Sara Sif Helgadóttir 4, 28,6%.
