Varð mjög erfitt hjá okkur

Hrannar Guðmundsson þjálfari kvennaliðs Stjörnunnar. Mynd/Stjarnan

„Upphafskaflinn í dag var ekkert ósvipaður og var í leiknum í Eyjum á fimmtudaginn. Það var jafnt fyrstu tíu mínúturnar. Eftir það fóru þær fram úr okkur meðan við komumst yfir í leiknum í Vestmannaeyjum. Svo var síðari hálfleikur erfiður. Þegar við áttum einhvern möguleika á að minnka muninn þá gekk tækifærið okkur úr greipum,“ sagði Hrannar Guðmundsson þjálfari Stjörnunnar í samtali við handbolta.is eftir tap Stjörnunnar fyrir ÍBV, 33:24, þegar liðin mættust öðru sinni í úrslitakeppni Olísdeildar kvenna í handknattleik í TM-höllinni í gær.


Liðin standa nú jöfn, hvort þeirra hefur einn vinning, sem leiðir til að þau mætast í oddaleik í Vestmannaeyjum á þriðjudaginn klukkan 18. Sigurliðið kemst í undanúrslit.


„Varnarleikurinn var ekki góður hjá okkur að þessu sinni. Markvarslan var eftir því. Sóknarleikurinn var viðunandi,“ sagði Hrannar en lið hans átti undir högg að sækja lengst af og lenti m.a. átta mörkum undir, 21:13, snemma í síðari hálfleik sem varð ekki til þess að létta róðurinn. Fjögurra marka munur var að loknum fyrri hálfleik, 16:12, ÍBV í vil.

Forréttindi að leika oddaleik í Eyjum

„Við fengum alltof mörg mörk á okkur eftir hraðauppahlaup. Það er mjög erfitt andlega þegar maður er nokkrum mörkum undir. Við bætum upp fyrir þetta á þriðjudaginn.


Okkur hefur gengið vel í Vestmannaeyjum á keppnistímabilinu, unnið einn, tapað einum með einu marki og öðrum með fimm marka mun, viðureign þar sem við vorum yfir þegar sex mínútur voru til leiksloka. Við förum óhrædd til Vestmannaeyja. Það fá ekki allir að leika oddaleik í Eyjum. Það eru forréttindi sem við hlökkum til að taka þátt í,“ sagði Hrannar Guðmundsson, þjálfari kvennaliðs Stjörnunnar, hvergi banginn eftir níu marka tap á heimavelli í gær.

- Auglýsing -

Nýjustu fréttir

- Auglýsing -