Varnarleikur var látinn lönd og leið þegar Alingsås, með Aron Dag Pálsson innan sinna raða, fékk næst neðsta lið sænsku úrvalsdeildarinnar, Varenberg í heimsókn í kvöld. Mörkin urðu alls 72 áður áður en flautað var til leiksloka. Þar af skoruðu Aron Dagur og félagar 41 og unnu þar með öruggan sigur og settust um leið í þriðja sæti deildarinnar með 23 stig eftir 17 leiki. Malmö er efst, hefur einnig 23 stig en hefur lokið 15 leikjum.
Aron Dagur skoraði sex mörk í átta tilraunum en var rólegur í stoðsendingunum að þessu sinni. Átti enga ef marka má tölfræði sænska handknattleikssambandsins. Aron Dagur er á meðal þeirra leikmanna deildarinnar sem átt hefur hvað flestar stoðsendingar til þessa eins og kom fram á handbolta.is á sunnudaginn.
Andreas Lang og Daniel Blomgren skoruðu 11 mörk hvor fyrir Alingsås og hélt sá síðarnefndi upp á nýjan samning við félagið með sannkallaðri flugeldasýningu.
