- Auglýsing -
Fjórir leikir eru á dagskrá á Íslandsmótinu í handknattleik að kvöldi bóndadags. Þrjár viðureignir fara fram í Grill 66-deild karla og ein í Grill 66-deild kvenna. Í Dalhúsum í Grafarvogi tekur efsta lið deildarinnar, Fjölnir, á móti Víkingi klukkan 19.30. Fjölnismenn eru eina taplausa lið deildarinnar þegar fjórar umferðir eru að baki. Þeir hafa sjö stig. Víkingar eru skammt á eftir með sex stig eins og HK og Valur U.
Í Kórnum í Kópavogi verður flautað til leiks klukkan 19.30 þegar HK fær nýliða Kríunnar í heimsókn. Krían hefur tapað tveimur leikjum í röð og hefur eflaust í hyggju að snúa vörn í sókn í heimsókn sinni til HK sem er í öðru sæti deildarinnar.
Loks mætast ungmennalið Selfoss og Vængir Júpíters í Hleðsluhöllinni á Selfossi klukkan 19.30. Sama er upp á teningnum hjá Vængjum Júpíters. Síðustu leikir hafa tapast og menn vilja vafalaust gera breytingu þar á gegn ungum og efnilegum Selfyssingum. Leikurinn í Hleðsluhöllinni verður sýndur í beinni útsendingu á SelfossTV. Eins og á öðrum leikjum kvöldsins þá verður áhorfendum ekki heimilaður aðgangur.
Í Hertz-höllinni á Seltjarnarnesi verður leikið í Grill 66-deild kvenna. Grótta fær ÍR í heimsókn klukkan 20. Þeta verður fyrsti leikur ÍR-inga eftir hléið þar sem liðið sat yfir í þriðju umferð um síðustu helgi
- Auglýsing -
