Verðum að koma hingað aftur á þriðjudaginn

Gunnar Gunnarsson, þjálfari Hauka. Mynd/Ívar

„Sóknarleikurinn fór með þetta hjá okkur fyrir utan það að byrjunin var alls ekki nógu góð hjá okkur, hvorki í vörn né sókn,“ sagði Gunnar Gunnarsson, þjálfari Hauka, í samtali við handbolta.is í Origohöllinni í dag eftir að Haukar töpuðu fyrsta leiknum við Val í úrslitakeppni Olísdeildar kvenna í handknattleik, 25:19.

„Okkur tókst þó að koma varnarleiknum ágætlega af stað eftir fimmtán til tuttugu mínútur og fengum markavörsluna með. Lokakafli fyrri hálfleiks var góður og við vorum ákveðin í að halda áfram á sama róli í byrjun síðari hálfleiks en það tókst því miður ekki í sókninni. Vörnin var áfram góð en það dugði ekki til. Það var fyrst og fremst sóknarleikurinn sem brást okkur,“ sagði Gunnar sem hefur tvo daga til þess að koma með lausnir fyrir annan leik liðanna í einvíginu.

„Til viðbótar þá nýttum við ekki færin sem við fengum til að minnka muninn og hleypa spennu í leikinn á lokakaflanum. Við verðum leysa vandann í sóknarleiknum fyrir viðureigninina á sunnudaginn, nýta tímann vel. Við verðum þar af leiðandi að mæta hingað á nýjan leik á þriðjudaginn í oddaleik,“ sagði Gunnar Gunnarsson, þjálfari Hauka í samtali við handbolta.is í dag.

- Auglýsing -

Nýjustu fréttir

- Auglýsing -