- Auglýsing -

Verður Erlingur eftirmaður Berge í Noregi?

Erlingur Richardsson landsliðsþjálfari Hollands. Mynd/Hafliði Breiðfjörð

Erlingur Richardsson, landsliðsþjálfari Hollands og þjálfari karlaliðs ÍBV í handknattleik, er einn þeirra sem nefndur er í tengslum við hugsanlga leit norska handknattleikssambandsins að næsta þjálfara karlalandsliðsins. Því er alltént velt upp á vef TV2 í Noregi.


Hermt er að dagar Christians Berge landsliðsþjálfara kunni að vera taldir og að hann hafi stýrt norska landsliðinu í síðasta sinn í gær gegn Íslendingum í leiknum um 5. sætið á EM. Sagt er að stjórnendur norska handknattleikssambandsins hafi gefið Berge þrjár vikur til að gefa ákveðið svar um hvort hann ætli að standa við samning sinn um þjálfun landsliðsins, samning sem gildir til ársins 2025.


Berge hefur þrálega verið orðaður við þjálfun norska úrvalsdeildarliðsins Kolstad en forráðamenn þess félags hugsa hátt og hafa sópað að sér leikmönnum sem eiga að koma til liðsins í sumar og sumarið 2023. Þar á meðal eru að minnsta kosti tveir Íslendingar, Janus Daði Smárason og Sigvaldi Björn Guðjónsson.


Ef Berge stekkur á Kolstad-verkefnið þá er Erlingur einn þeirra þjálfara sem eru í sigtinu. Erlingur hefur náð frábærum árangri með hollenska landsliðið á undanförnum árum og kórónaði árangur sinn með því að ná 10. sæti á EM. Auk þess þá mun vera stutt eftir af samningi Erlings við hollenska sambandið.


Aðrir sem nefndir eru til sögunnar eru Glenn Solberg, landsliðsþjálfari Svía, Jonas Wille, aðstoðarmaður Berge og þjálfari Kristianstad í Svíþjóð, Kristian Kjelling, þjálfari Drammen og Börge Lund þjálfari Noregsmeistara Elverum.

- Auglýsing -
- Auglýsing -

Nýjustu fréttir

- Auglýsing -