Sigurður Bragason, þjálfari kvennaliðs ÍBV, er ómyrkur í máli um ástandið í samgöngumálum Vestmannaeyja í samtali við Eyjafréttir í dag. Fjórir vinnudagar fara í tvo kappleiki liðsins vegna þess að Herjólfur siglir aðeins til Þorlákshafnar um þessar mundir. Landeyjarhöfn er lokuð og óvíst hvenær hún verður opnuð næst.
Hinn kosturinn er rándýrt leiguflug að sögn Sigurðar sem skefur ekkert utan því þegar hann fullyrðir að hann hafi ekki kynnst lakari samgöngum á þeim þremur áratugum sem hann hafi verið viðloðandi handboltann og íþróttastarf í Vestmannaeyjum.
Ekki hægt að sigla í Landeyjarhöfn þar sem dýpi í höfninn er svo lítið. „Af hverju í ósköpunum er t.d. ekki komið alvöru grafskip í þetta verkefni núna 12 árum eftir opnun hafnarinnar? Það sjá það allir sem vilja að þetta hrúgald sem okkur er boðið upp á er ónýtt,“ segir Sigurður í viðtali við Eyjafréttir.
Sigurður segir að af 16 leikmönnum ÍBV séu níu í fullri vinnu. Til þess að þeir geti tekið þátt í öllum þeim leikjum sem liðið þarf að leika um þessar mundir séu leikmenn meira og minna frá vinnu vegna stopulla og langra ferða á milli lands og Eyja. Þar á ofan sé mikill kostnaður við gistingu og uppihald. Einnig bitni þetta allt saman á æfingum, undirbúningi og hvíld leikmanna.
ÍBV-liðið mætti Aftureldingu í Mosfellsbæ í gærkvöld og kemur heim í dag. Ekki seinna en á morgun heldur liðið af stað aftur til Reykjavíkur þar sem það leikur við Fram á laugardaginn.
Nánar er hægt að lesa viðtalið við Sigurð á vef Eyjafrétta.
