Viggó Kristjánsson landsliðsmaður í handknattleik og leikmaður Stuttgart. Mynd/EPA

Viggó Kristjánsson átti stórleik í dag fyrir Stuttgart þegar liðið gerði fremur óvænt jafntefli við næst efsta lið þýsku 1. deildarinar í handknattleik, Füchse Berlin, 32:32, á heimavelli. Viggó skoraði sjö mörk í átta skotum og átti þar á ofan sex stoðsendingar. Tvö marka sinna skoraði Seltirningurinn úr vítaköstum.


Handknattleiksmaðurinn efnilegi, Andri Már Rúnarson, skoraði eitt mark úr sínu eina markskoti en Andri hefur gert það gott á sínu fyrsta keppnistímabili í Þýskalandi. Stuttgart var fjórum mörkum yfir að loknum fyrri hálfleik, 16:12.


Stuttgart hefur ekki vegnað sem best á leiktíðinni. Liðið er í næst neðsta sæti með fimm stig eftir 11 leiki. Berlínarliðið er í öðru sæti með 18 stig. Hans Lindberg fór á kostum í lið Füchse Berlin, skoraði 11 mörk í 12 tilraunum.

Magdeburg er efst í deildinni með 22 stig eftir 11 leiki. Leik Magdeburg og Nettelstedt sem fram átti að fara í dag var frestað vegna þess að kórónuveiran herjar innan liðsins þessa dagana eins og svo víða í Þýskalandi.

- Auglýsing -

Nýjustu fréttir

- Auglýsing -