Víkingur slapp naumlega fyrir horn í háspennuleik

Logi Snædal Jónsson og félagar í Víkingi unnum naumlega í kvöld. Mynd/Víkingur Finnbogi Sigur Marinósson

Víkingur vann Hörð í tvíframlengdum háspennuleik í fyrstu viðureign liðanna í undanúrslitum umspils um sæti í Olísdeild karla í handknattleik, 40:34. Harðarmenn voru óheppnir að vinna ekki leikinn því þeir fengu svo sannarlega tækifæri til þess, bæði í lok venjulegs leiktíma og síðustu andartökum fyrri framlengingarinnar. Næsta viðureign liðanna verður í íþróttahúsinu Torfnesi á laugardaginn og ef marka má leikinn í kvöld er engu hægt að spá um úrslit.

Alltént er óhætt að segja að Víkingar hafi sloppið fyrir horn á heimavelli í kvöld.


Hörður var marki yfir, 16:15, að loknum fyrri hálfleik í Víkinni í kvöld. Þegar 14 sekúndur voru eftir af hefðbundum leiktíma var staðan jöfn 27:27. Harðarmenn fengu sókn í kjölfar þess að skot Víkinga geigaði. Leikmenn Harðar komust yfir, 28:27, og virtust vera að vinna leikinn þegar þeir sofnuðu á verðinum og Jóhannes Berg Andrason jafnaði metin fyrir Víkinga, 28:28, sekúndu áður en leiktíminn var úti.


Fyrri framlengingin var jöfn. Harðarmenn áttu síðustu sóknina. Nokkrum sekúndum fyrir leikslok áttu Ísfirðingar skot í slá, boltinn hrökk út á leikvöllinn þar sem Harðarmenn náðu frákastinu og komu skoti á markið sem Sverrir Andrésson, markvörður Víkings, varði rétt áður en leiktíminn var úti, staðan 32:32.


Í annarri framlengingu var meira eftir af orku á tankinum hjá Víkingi en hjá leikmönnum Harðar.

Mörk Víkings: Arnar Steinn Arnarsson 13, Arnar Gauti Grettisson 8, Jóhannes Berg Andrason 6, Logi Snædal Jónsson 4, Styrmir Sigurðsson 4, Hjalti Már Hjaltason 3, Ólafur Guðni Eiríksson 1, Egidijus Mikalonis 1.

Mörk Harðar: Raivis Gorbunovs 7, Guntis Pilpukas 7, Tadeo Salduna 6, Jón Ómar Gíslason 3, Daníel Wale Adeleye 3, Ásgeir Óli Kristjánsson 2, Þráinn Ágúst Arnaldsson 2, Aleksa Stevanovic 1, Elías Guðjónsson 1, Óli Björn Vilhjálmsson 1, Sudario Carneiro 1.

Fyrir áhugamenn um spennandi handboltaleiki er óhætt að mæla með að skoða upptöku frá leiknum á youtubesíðu Víkings sem hægt er að nálgast hér og spóla yfir á lokakaflann.

- Auglýsing -

Nýjustu fréttir

- Auglýsing -