Aron Kristjánsson, þjálfari karlaliðs Hauka. Mynd/Haukar

„Við erum með jafnan og breiðan leikmannahóp og viljum nýta hann sem best. Þess vegna hreyfi ég hópinn mikið í leikjum og held þannig mönnum á tánum,“ sagði Aron Kristjánsson, þjálfari karlaliðs Hauka í samtali við handbolta.is. Athygli hefur vakið í tveimur fyrstu leikjum Hauka í Olísdeildinni á nýju ári, gegn Þór á laugardaginn og á móti Aftureldingu í gærkvöld þá gerði Aron tíðar breytingar á liðinu sem lék inni á vellinum hverju sinni.


„Það eiga allir leikmenn eftir að vera í stórum hlutverkum á keppnistímabilinu sem framundan er og ég vil halda mönnum við efnið, venja þá við að vera tilbúnir hvenær sem er í leiknum þegar óskað er eftir kröftum þeirra. Ég held að þetta vinni með okkur þegar fram í sækir. Með þessu móti vil ég að menn séu einbeittari þann tíma sem þeir eru í leiknum, sýni meiri kraft og um leið verði meiri styrkur í leik okkar. Með þessu móti vonast ég einnig eftir að dreifa álaginu það vel að hver og einn geti æft af fullum krafti á næstu æfingu eftir hvern leik,“ sagði Aron í samtali við handbolta.is í eftir sigurleikinn á Aftureldingu, 30:24, að Varmá í gærkvöldi.

Með sigrinum fóru Haukar upp í efsta sæti Olísdeildarinnar. Næsti leikur Hauka verður á móti Fram í Schenkerhöllinni á sunnudaginn. Flautað verður til leiks klukkan 15.30.
Stöðuna og næstu leiki í Olísdeildum karla og kvenna og í Grill 66-deildum karla og kvenna er að finna á nýrri undirsíðu handbolta.is.

- Auglýsing -

Nýjustu fréttir

- Auglýsing -