Vonast til að verða með

Ólafur Andrés Guðmundsson, landsliðsmaður í handknattleik og leikmaður IFK Kristianstad í Svíþjóð er á batavegi eftir að hafa tognað í lærvöðva fyrir rúmum hálfum mánuði.

Vegna meiðslanna varð Ólafur Andrés að draga sig út úr landsliðinu fyrir leikinn við Litháa í síðustu viku.

Ólafur Andrés æfir með IFK Kristianstad-liðinu í dag og á morgun. „Ef allt gengur vel vonast ég til að geta spilað á miðvikudaginn,“ sagði Ólafur í skilaboðum til handbolta.is í gær.

IFK Kristianstad fær Sävehof í heimsókn á miðvikudagskvöld. Sävehof situr í fimmta sæti sænsku úrvalsdeildarinnar með 11 stig eftir níu leiki, er fjórum stigum á eftir Kristianstad sem er í efsta sæti.