Sennilega varð von Kristjáns Arnar Kristjánssonar, Donna, og samherja í PAUC um að krækja í annað sæti frönsku 1. deildarinnar í handknattleik á lokasprettinum að engu í kvöld þegar þeir töpuðu fyrir Cesson Rennes á útivelli, 28:25, á sama tíma og Nantes vann Montpellier, 29:27, einnig á útivelli. Nantes hefur þar með þriggja stiga forskot á PAUC þegar þrjár umferðir eru eftir. PSG er lang efst með 54 stig að loknum 27 leikjum.
Donni skoraði þrjú mörk í fjórum skotum í leiknum við Cesson Rennes en liðið hefur komið nokkuð á óvart á leiktíðinni með öflugri spilamennsku.
Ólafur Andrés Guðmudsson var ekki í leikmannahópi Montpellier í kvöld í tapinu fyrir Nantes. Ólafur hefur ekki komið við sögu hjá liðinu eftir Evrópumótið í janúar.
Ekki er öll nótt úti
Ekki er öll nótt úti hjá Elvari Ásgeirssyni og samherjum í Nancy. Þeir reka ennþá lestina í deildinni en þeir unnu þó í kvöld, liðsmenn Chartres, 34:31, á heimavelli. Nancy hefur níu stig og á ennþá möguleika á að komast upp úr fallsætum vinni liðið leikina þrjá sem það á eftir að því tilskyldu að leikmenn Istres og Sara falli allur ketill í eld.
Elvar tók ekkert þátt í sigurleiknum í kvöld.
