Ýmir Örn Gíslason og félagar í Rhein-Neckar Löwen komust á ný í efsta sæti þýsku 1. deildarinnar í handknattleik í kvöld þegar þeir unnu SC Magdeburg, 33:31, í Magdeburg þegar sjöunda umferð deildarinnar hófst. Þetta var þriðja tap Magdeburg á heimavelli í fjórum leikjum það sem af er leiktíð. Harla óvenjulegt er að liðið tapi svo mörgum leikjum á heimavelli á einni leiktíð, hvað þá þegar svo stutt er liðið á keppnistímabilið.
Ljónin voru með þriggja marka forskot að loknum fyrri hálfleik, 18:15. Ýmir Örn skoraði eitt mark fyrir liðið. Ómar Ingi Magnússon skoraði sex mörk fyrir Magdeburg og Gísli Þorgeir Kristjánsson eitt.
Löwen er með 12 stig að loknum sjö leikjum, er tveimur stigum á undan Kiel og Flensburg sem áttu að leika í kvöld en leikjum þeirra við Füchse Berlin og Melsungen var frestað vegna veikinda leikmanna Flensburg og Berlínarrefanna.
Bjarki Már Elísson tyllti sér í efsta sæti yfir markahæstu leikmenn deildarinnar þegar hann skoraði 10 mörk, þar af sjö úr vítakasti, þegar lið hans Lemgo steinlá á heimavelli fyrir botnliði Balingen, 32:26. Oddur Gretarsson skoraði tvisvar úr vítakasti fyrir Balingen sem tókst að vinna inn sín fyrstu stig á keppnistíðinni. Bjarki Már hefur skoraði 52 mörk til þessa.
Viggó Kristjánsson skoraði sex mörk, þar af tvö úr vítakasti, þegar Stuttgart tapaði með níu marka mun í heimsókn sinni til Erlangen, 34:25. Staðan var jöfn að loknum fyrri hálfleik, 16:16. Elvar Ásgeirsson skoraði ekki mark að þessu sinni fyrir Stuttgart. Viggó er næst markahæstur í deildinni með 50 mörk.
Tap Stuttgart getur ekki eingöngu skrifast á fjarveru Johannes Bitter markvarðar þar sem Erlangen liðið var í sömu sporum. Aðalmarkvörður liðsins, Klemen Ferlin, var fjarverandi eins og Bitter. Báðir eru þeir með kórónuveiruna eftir að hafa verið með landsliðum sínum.
Nordhorn vann Ludwigshafen, 27:24.
Staðan, leikjafjöldi innan sviga:
R-N Löwen 12(7), Kiel 10(6), Flensburg 10(6), Melsungen 9(6), Stuttgart 9(6), Magdeburg 8(7), Lemgo 8(7), Leipzig 7(6), Bergischer 7(6), F.Berlin 7(6), Erlangen 7(7), Göppingen 6(5), Wetlzar 6(6), H.Burgdorf 6(6), Nordhorn 4(7), Minden 3(6), Ludwigshafen 3(7), Essen 2(5), Balingen 2(7), Coburg 0(6).
