Guðmundur Hólmar Helgason var markahæstur hjá Selfossliðinu í kvöld með sjö mörk. Mynd/UMFS/SÁ

Selfoss vann öruggan sigur á Gróttu, 32:23, í lokaleik 6. umferð Olísdeildar karla í handknattleik í Sethöllinni á Selfossi í kvöld. Selfossliðið er þar með komið upp í áttunda sæti deildarinnar og fór upp fyrir KA sem féll niður í níunda sætið með stigin sín sex í níu leikjum.


Selfossliðið var með frumkvæðið í fyrri hálfeik og var komið með þriggja marka forskot, 9:6, eftir stundarfjórðung. Í hálfleik var munurinn kominn upp í fjögur mörk, 16:12.

Í síðari hálfleik var nánast um einstefnu að ræða að hálfu heimaliðsins. Botn datt úr Gróttuliðinu sem átti fá svör við góðum varnarleik Selfoss sem nú hefur unnið tvo leiki á heimavelli í röð með allnokkrum mun gegn liðum sem eru neðar í stöðutöflunni.

Athygli vakti að Birgir Steinn Jónsson skoraði ekki mark að þessu sinni en venjulega er hann allt í öllu í sóknarleik Gróttu. Einar Baldvin Baldvinsson markvörður sem varði eins og berserkur gegn Víkingi var ekki nema skugginn af sjálfum sér í Sethöllinni.

Vilius Rasimas náði sér vel á strik í marki Selfoss en hann tók nú þátt í öðrum leiknum í röð eftir meiðsli.


Mörk Selfoss: Guðmundur Hólmar Helgason 7, Ragnar Jóhannsson 5, Árni Steinn Steinþórsson 3, Alexander Már Egan 3, Einar Sverrisson 3/1, Hergeir Grímsson 3, Ísak Gústafsson 2, Richard Sæþór Sigurðsson 2, Karolis Stropus 1, Guðjón Baldur Ómarsson 1, Tryggvi Þórisson 1, Elvar Elí Hallgrímsson 1.
Varin skot: Vilius Rasimasm 14, 41,2% – Sölvi Ólafsson 1/1, 33,3%.

Mörk Gróttu: Andri Þór Helgason 7/4, Ólafur Brim Stefánsson 3, Ágúst Emil Grétarsson 2, Akimasa Abe 2, Igor Mrsulja 2, Sveinn Brynjar Agnarsson 2, Gunnar Dan Hlynsson 2, Hannes Grimm 1, Ingólfur Arnar Þorgeirsson 1/1, Lúðvík Thorberg Bergmann Arnkelsson 1.
Varin skot: Einar Baldvin Baldvinsson 4, 13,8% – Ísak Arnar Kolbeinsson 0.


Öll tölfræði leiksins er hjá HBStatz.

Stöðuna og næstu leiki í Olísdeild karla er að finna hér

- Auglýsing -

Nýjustu fréttir

- Auglýsing -