Forráðamenn franska stórliðsins PSG leita nú með logandi ljósi að leikmanni sem getur hlaupið í skarðið fyrir Nikola Karabatic sem verður frá keppni út leiktíðina eftir að hafa slitið krossband fyrir um mánuði. TV2 í Danmörku hefur heimildir fyrir því að slóvenski miðjumaðurinn Sebastian Skube sé undir smásjá PSG. Skube hefur leikið með Bjerrginbro/Silkeborg undanfarin sex ár.
TV2 segir að viðræður standa yfir á milli félaganna um að PSG kaupi Skube undan samningi hjá Bjerrginbro/Silkeborg vegna þess að liðið vanti nú þegar miðjumann sem getur að einhverju leyti hlaupið í skarðið fyrir Karabatic. Skube rennur út af samningi hjá Bjerrginbro/Silkeborg við lok leiktíðar næsta vor, eins og handbolti.is greindi frá á dögunum.
Skube hefur verið lykilmaður í sóknarleik Bjerrginbro/Silkeborg. Á þessu tímabilið hefur hann skorað 41 mark, átt 34 stoðsendingar í 11 leikjum í dönsku úrvalsdeildinni. Forráðamenn Bjerrginbro/Silkeborg og Skube eru sagðir vera þögulir sem gröfin um þessi meintu vistaskipti.
Fyrr í þessu mánuði var greint frá því að PSG hefði augastað að Hollendingnum Luc Steins hjá Toulouse. Forsvarsmenn Toulouse voru hinsvegar ekki á þeim buxunum að gefa Steins eftir.
