Franski handknattleiksmaðurinn Nikoal Karabatic leikur ekki meira með PSG eða franska landsliðinu á þessu keppnistímabili. Karabatic meiddist á hné og varð að fara af leikvelli í viðureign PSG og Ivry. Félag hans staðfesti í morgun að í ljós hafi komið að fremra krossband í hægra hné sé slitið.
Karabatic fer í aðgerð á næstu dögum og leikur ekki handknattleik aftur fyrr en á næsta keppnistímabili.
Karabatic hefur verið í allra fremstu röð handknattleiksmanna í nærri tvo áratugi. Honum skaut snemma fram á sjónarsviðið sem bráðgerum handknattleiksmanni. Segja má að hann hafi verið burðarás franska landsliðsins nánast alla þessa öld auk þess að vera í stóru hlutverki hjá mörgum af stærstu félagsliðum Evrópu, Montpellier, Kiel, Barcelona og PSG.
