Aron Kristjánsson, þjálfari Hauka. Mynd/Eyjólfur Garðarsson

„Ég er vonsvikinn með að hafa ekki unnið leikinn. Við vorum komnir með góða stöðu í fyrri hluta síðari hálfleiks en gáfum þá eftir. Það má ekki gefa mikið eftir til þess að missa leik úr höndunum. Stundum þarf ekki nema tvær slakar sendingar, eitt eða tvö óöguð skot eða dauðafæri,“ sagði Aron Kristjánsson, þjálfari karlaliðs Hauka, eftir jafntefli á heimavelli, 26:26, við Val í Olísdeild karla í handknattleik í gær. Tjörvi Þorgeirsson tryggði Haukum annað stigið á elleftu stundu.


„Við misstum dampinn í stuttan tíma og þá varð staðan jöfn á stuttum tíma. Síðan bættust við nokkur atriði á lokakaflanum þar sem velta má vöngum yfir hvort dæma hefði átt vítakast í stað ruðnings eða öfugt og fleira. Ég er sannarlega svekktur með að hafa aðeins fengið annað stigið. Ég leyni því ekki,“ sagði Aron.


„Mér fannst við vera sjálfum okkur verstir síðasta korterið. Við vorum heldur ekki nógu grimmir í vörninni sem varð til þess að við fengum of einföld mörk á okkur,“ sagði Aron Kristjánsson, þjálfari Hauka, í samtali við handbolta.is í gærkvöld.

Stöðuna og næstu leiki í Olísdeild karla er hægt að sjá hér.

- Auglýsing -

Nýjustu fréttir

- Auglýsing -