Guðmundur og lærisveinar upp í áttunda sæti

Guðmundur Þórður Guðmundsson, þjálfari Melsungen, gefur leikmönnum sínum skipanir. Mynd/MT Melsungen

Guðmundur Þórður Guðmundsson, þjálfari Melsungen, gat fagnað sigri í dag þegar lið hans lagði Ludwigshafen á útivelli í þýsku 1. deildinni í handknattleik, 30:27, eftir að hafa verið þremur mörkum yfir að loknum fyrri hálfleik, 14:11. Með sigrinum færðist Melsungen upp í áttunda sæti deildarinnar með 23 stig að loknum 19 leikjum en liðið á nokkra leiki til góða á flest lið deildarinnar að þeim tveimur efstu undanskildum.


Arnar Freyr Arnarsson var ekki í leikmannahópi Melsungen að þessu sinni, ekkert fremur en í leiknum við Balingen á fimmtudaginn. Hann sneri sig á ökkla á dögunum en er óðum að ná sér á strik.


Þýsku landsliðsmennirnir Julius Kühn og Timo Kastening voru markahæstir hjá Melsungen með átta og sjö mörk. Max Neuhas og Maximilian Haider skoruðu sex mörk hvor fyrir Ludwigshafen.


Norhorn vann Tusem Essen í slag liða í neðri hlutanum, 22:19. Viðureign Lemgo og Göppingen var frestað vegna þess að leikmenn Lemgo eru í sóttkví eftir að smit greindist í leikmannahópnum á dögunum.


Staðan í þýsku 1. deildinni:
Flensburg 34(19), Magdeburg 34(22), Kiel 33(19), Rhein-Neckar Löwen 32(22), Göppingen 29(21), Bergischer HC 27(22), Füchse Berlin 27(22), Melsungen 23(19), Leipzig 23(23), Lemgo 22(21), Wetzlar 22(22), Erlangen 22(23), Stuttgart 21(23), Hannover-Burgdorf 18(22), GWD Minden 16(23), Balingen-Weilstetten 13(22), Nordhorn 12(22), Essen 9(22), Ludwigshafen 9(22), Coburg 8(23).

- Auglýsing -

Nýjustu fréttir

- Auglýsing -