Valgerður Ýr og Margrét Ýr fóru á kostum í sigri HK

Halldór Harri Kristjánsson þjálfari HK og leikmenn hans. Mynd/Egill Bjarni Friðjónsson

HK gerði sér lítið fyrir og lagði Stjörnuna með sex marka mun, 34:28, í Olísdeild kvenna í handknattleik í Kórnum í dag. Þar með hefur HK-liðið fengið fimm stig úr síðustu sex leikjum í deildinni og greinilega á mikilli siglingu. Erfiðleikar Stjörnunnar halda áfram. Liðið er með tvo sigurleiki og fjögur töp eftir fyrstu sex umferðirnar.


Varnarleikur Stjörnunnar var í molum í dag og markvarsla vart merkjanlega.
HK náði fljótlega yfirhöndinni í leiknum í dag og hafði fjögurra marka forskot í hálfleik, 16:12. Ekki síst var markvörðurinn Margrét Ýr Björnsdóttir munurinn á liðunum í fyrri hálfleik. Hún fór á kostum og varði oft úr opnum færum.


HK hélt áfram að bæta við forskot sitt framan af síðari hálfleik. Stjörnuliðinu tókst að berja í brestina um stund og minnka forskot HK niður eitt mark, 21:20, og átti möguleika á að jafna metin. Valgerður Ýr Þorsteinsdóttir, besti leikmaður vallarins, kom í veg fyrir það. Hún fiskaði boltann af Stjörnuliðinu og kom HK tveimur mörkum yfir og þremur mörkum yfir skömmu síðar. Stjarnan gat ekki minnkað muninn eftir það. Þvert á móti þá jóst forysta HK á ný.


Sem fyrr segir þá var Valgerður Ýr frábær í leiknum. Hún skoraði 10 mörk í 11 skotum, átti fjórar stoðsendingar og vann boltann tvisvar af Stjörnunni. Jóhanna Margrét Sigurðardóttir lék einnig afar vel eins og Elna Ólöf Guðjónsdóttir var sívinnandi á báðum endum leikvallarins. Ekki má gleyma Margréti Ýri markverði HK.


Lena Margrét Valdimarsdóttir og Eva Björk Davíðsdóttir voru bestar hjá Stjörnunni. Sóknarleikurinn var lengst af bærilegur. Hinsvegar var varnarleikur og markvarsla Stjörnunni að falli fyrsta og fremst.


Mörk HK: Valgerður Ýr Þorsteinsdóttir 10, Jóhanna Margrét Sigurðardótir 9/4, Elna Ólöf Guðjónsdóttir 4, Karen Kristinsdóttir 3, Sara Katrín Gunnarsdóttir 2, Alexandra Líf Arnarsdóttir 2, Guðrún Erla Bjarnadóttir 2, Þóra María Sigurjónsdóttir 2/2.
Varin skot: Margrét Ýr Björnsdóttir 13, 34,2%.
Mörk Stjörnunnar: Lena Margrét Valdimarsdóttir 7, Helena Rut Örvarsdóttir 6, Eva Björk Davíðsdóttir 6/1, Elísabet Gunnarsdóttir 4, Ásthildur Bertha Bjarkadóttir 2, Katla María Magnúsdóttir 1, Stefanía Theodórsdóttir 1, Elena Elísabet Birgisdóttir 1,
Varin skot: Darija Zecevic 5, 16,7% – Tinna Húnbjörg Einarsdóttir 1, 10%.

Öll tölfræði leiksins er hjá HBStatz.

Stöðuna og næstu leiki í Olísdeild kvenna er að finna hér.

Handbolti.is fylgdist með leiknum í stöðu- og textauppfærslu hér fyrir neðan.

- Auglýsing -

Nýjustu fréttir

- Auglýsing -