Andri Snær Stefánsson, þjálfari KA/Þórs, og leikmenn hans er í Kósovó. Mynd/Egill Bjarni Friðjónsson

Íslandsmeistarar KA/Þórs sitja áfram í efsta sæti Olísdeildar kvenna eftir að hafa lagt Stjörnuna á heimavelli í dag með eins marks mun, 27:26, í KA-heimilinu í dag, í annarri umferð. Sigurinn var ekki eins tæpur og lokatölurnar gefa til kynna því KA/Þór var með fimm marka forskot, 27:22, þegar þrjár mínútur voru til leiksloka. Stjarnan þar með án stiga eftir tvo leiki.


KA/Þór var marki yfir í hálfleik, 12:11, eftir að liðin höfðu skipst á um að vera yfir. Stjarnan byrjaði leikinn betur og var með yfirhöndina, 7:5, áður en KA/Þór sneri leiknum sér í hag í framhaldi af vel heppnuðu leikhléi. Hraðinn var mikill í fyrri hálfleik og á ýmsu gekk. Darija Zecevic, markvörður Stjörnunnar, varði vel og reyndist leikmönnum KA/Þórs erfið.


KA/Þórsliðið tók af skarið í síðari hálfleik. Vörn liðsins var afar góð og lokaði fyrir hverja sókn Stjörnunnar á fætur annarri. Upp úr því gáfust hraðaupphlaup sem voru vel nýtt. Um miðjan síðari hálfleik var forskot KA/Þórs komið í sjö mörk, 21:14. Þar með var grunnur lagður að sigrinum þótt Stjarnan gerði vel í lokin að klóra í bakkann í stað þess að leggja árar í bát.


Mörk KA/Þórs: Rakel Sara Elvarsdóttir 8, Ásdís Guðmundsdóttir 5, Aldís Ásta Heimisdóttir 4, Martha Hermannsdóttir 3/2, Unnur Ómarsdóttir 2, Sofie Söberg Larsen 2, Rut Arnfjörð Jónsdóttir 1, Sólveig Lára Kristjánsdóttir 1, Anna Þyrí Halldórsdóttir 1.
Varin skot: Matea Lonac 8, 23,5%.
Mörk Stjörnunnar: Eva Björk Davíðsdóttir 10/5, Stefanía Theodórsdóttir 5, Lena Margrét Valdimarsdóttir 4, Anna Karen Hansdóttir 2, Helena Rut Örvarsdóttir 2, Britney Cots 1, Elena Elísabet Birgisdóttir 1, Sonja Lind Sigsteinsdóttir 1.
Varin skot: Darija Zecevic 12, 37,5%. Tinna Húnbjörg Einarsdóttir 7, 53,8%.

Staðan og næstu leikir í Olísdeild kvenna.

Öll tölfræði leiksins hjá HBStatz.

- Auglýsing -

Nýjustu fréttir

- Auglýsing -