- Auglýsing -
- Orri Freyr Þorkelsson skoraði fimm mörk þegar Elverum vann Nærbø öðru sinni í undanúrslitum norsku úrvalsdeildarinnar í handknattleik í gær, 34:24. Leikið var í Nærbø. Aron Dagur Pálsson skoraði ekki mark að þessu sinni fyrir Elverum sem þarf einn sigur til viðbótar til að komast í úrslit þar sem liðið mætir að öllum líkindum Arendal. Arendal vantar einn sigur til viðbótar í rimmu sinni við Drammen.
- Gummersbach, sem leikur undir stjórn Guðjóns Vals Sigurðssonar, er öruggt um sæti í þýsku 1. deildinni á nýjan leik. Hamm-Westfalen gerði jafntefli við Grosswallstadt í gær. Þar af leiðandi er ljóst að ef svo færi að Gummersbach tapaði öllum sínum leikjum sem eftir eru í 2. deildinni þá er liðið öruggt um að ná öðru af tveimur efstu sætum deildarinnar. Tvö lið fara upp úr 2. deild og í þá fyrstu í lok keppnistímabilsins. Auk Guðjóns Vals þjálfara þá leika Eyjamennirnir Elliði Snær Viðarsson og Hákon Daði Styrmisson með Gummersbach.
- Gríska meistaraliðið AEK Aþena er komið í erfiða stöðu í úrslitaeinvígi um meistaratitilinn í Grikklandi eftir annað tap fyrir Olympiakos, 22:21, í gærkvöld. Eins og handbolti.is sagði frá á laugardaginn var þjálfara AEK sagt upp störfum með talsverðum fyrirgangi eftir tapið í fyrsta leiknum á síðasta laugardag. Nýjum þjálfara tókst ekki að snúa gæfuhjóli AEK-liðsins á örfáum dögum og ljóst að ekki hefur brúnin orðið léttari á Stamatis Papastamatis forseta félagsins.
- Viktor Gísli Hallgrímsson og félagar eru komnir áfram í 16-liða úrslit dönsku bikarkeppninnar eftir sigur á HC Odense, 30:29, í gærkvöld.
- Teitur Örn Einarsson og samherjar í Flensburg mæta Barcelona í kvöld í fyrri viðureign liðanna í átta liða úrslitum Meistaradeildar Evrópu í handknattleik. Leikurinn fer fram í Flensburg og hefst klukkan 16.45. Hægt verður að fylgjast með leiknum í útsendingu EHFtv.
- Auglýsing -
