Handknattleiksmaðurinn Björgvin Þór Hólmgeirsson hefur endurskoðað ákvörðun sína um að rifa seglin á handknattleiksvellinum, tekið fram handboltaskóna á nýjan leik og hafið æfingar með Stjörnunni.
Björgvin Þór staðfesti þetta í samtali við Vísir.is í gær.
Hann sagði í samtali við handbolta.is snemma í ágúst að miklar annir yllu því að hann gæti ekki verið með Stjörnunni. Hvort fríið væri til lengri eða skemmri tíma væri óvíst.
Ástæða sinnaskiptanna mun vera sú að nokkuð er um meiðsli herbúðum Stjörnunnar um þessar mundir og vill Björgvin Þór leggja sitt lóð á vogarskálarnar. Hann lék afar vel með liðinu á síðasta keppnistímabili og varð m.a. næst markahæsti maður Stjörnuliðsins sem komst í fyrsta sinn í undanúrslit um Íslandsmeistaratitilinn í Olísdeild karla.
