Tryggvi Þórisson og samherjar í sænska liðinu IK Sävehof er komnir áfram í aðra umferð undankeppni Evrópudeildarinnar í handknattleik eftir að hafa lagt rúmenska liðið Potaissa Turda öðru sinn í 1. umferð undankeppninnar í dag, 34:30, í Turda. Sävehof vann heimaleikinn um síðustu helgi með yfirburðum og rimmuna samanlagt, 79:51.
Tryggvi skoraði eitt mark í leiknum í dag. Færeyingarnir Óli Mittún og Elias Ellefsen á Skipagøtu skoruðu samanlagt sex mörk og var sá fyrrnefndi alla atkvæðamikill.
Ljóst er að Potaissa Turda má muna sinn fífil fegri frá árunum 2017 og 2018 þegar liðið lék Val og ÍBV grátt og vann m.a. Áskorendakeppni Evrópu 2018.
Sävehof er þar með komið í aðra umferð keppninnar eins og Bjerringbro/Silkeborg, Constanta, Aguas Santas Milaneza, Kristianstad og Lemgo. Fyrstu umferð undankeppninnar lýkur á morgun og þá verða Íslendingar í eldlínunni með norsku liðunum Kolstad og Drammen, Alpla Hard frá Austurríki og GC Amicitia Zürich frá Sviss.
Dregið verður í aðra umferð undankeppninnar á þriðjudaginn. Sigurliðin 12 í annarri umferð taka sæti með 12 öðrum liðum, þar á meðal Val, í riðlakeppni Evrópudeildinnar sem hefst í lok október.
