Afturelding á toppinn á ný

Úlfar Páll Monsi Þórðarson sem þarna stekkur inn úr vinstra horninu í leik KA og Aftureldingar á dögunum verður frá keppni um skeið. Mynd/Einar Bjarni Friðjónsson

Afturelding tyllti sér á topp Olísdeildar karla í handknattleik á nýjan leik í kvöld eftir eins marks sigur á KA í KA-heimilinu í kvöld, 25:24. Afturelding hefur þar með níu stig að loknum fimm leikjum og er stigi á undan ÍBV, FH og Val og á meira að segja einn leik til góða á FH.


KA var með yfirhöndina fyrstu 50 mínútur leiksins í kvöld, m.a 13:11, að loknum fyrri hálfleik. Mosfellingar létu ekki hug falla heldur bitu hressilega frá sér á lokasprettinum og létu fjarveru þjálfara síns, Gunnars Magnússonar, ekki slá sig út af laginu en Gunnar er í sóttkví.
Eftir að Aftureldingarmenn komust yfir, 20:19, þegar tíu mínúturu voru til leiksloka þá litu þeir aldrei um öxl. Þeir voru komnir með þriggja marka forskot um skeið.

Hafsteinn Óli Berg Ramos Rocha skoraði sitt fjórða mark í leiknum þegar rúm mínúta var til leiksloka en það var um leið 25. mark Aftureldingar. KA-menn reyndu hvað þeir gátu að jafna metin en allt kom fyrir ekki. Þar með var fjórði sigur Aftureldingar í röð á KA staðreynd en liðin áttust við í þrígang á síðustu leiktíð og máttu KA-menn bíta í það súra epli að tapa í öll skiptin.

Árni Bragi Eyjólfsson reyndist gömlu samherjum sínum í Aftureldingu erfiður í kvöld. Hér flýgur hann fyrir ofan þá og freistar þess að grípa boltann og skora eitt tíu marka sinna. Mynd/EinarBjarni Friðjónsson


Mörk KA: Árni Bragi Eyjólfsson 10/2, Áki Egilsnes 3, Daði Jónsson 3, Jóhann Geir Sævarsson 2, Ólafur Gústafsson 2, Patrekur Stefánsson 1, Einar Birgir Stefánsson 1, Ragnar Snær Njálsson 1.
Varin skot: Nicholas Satchwell 10 skot, 29,4%.
Mörk Aftureldingar: Úlfar Páll Monsi Þórðarson 6/2, Blær Hinriksson 4, Hafsteinn Óli Berg Ramos Rocha 4, Þorsteinn Leó Gunnarsson 4, Þorsteinn Gauti Hjálmarsson 3, Þrándur Gíslason Roth 2, Einar Ingi Hrafnsson 1, Gunnar Kristinn Malmquist Þórsson 1.
Varin skot: Arnór Freyr Stefánsson 7 skot, 28%, Bjarki Snær Jónsson 3 skot, 33;3%.

- Auglýsing -

Nýjustu fréttir

- Auglýsing -