Aldís Ásta Heimisdóttir úr KA/Þór var kölluð í morgun inn í landsliðið fyrir leikinn við Serba á morgun. Mynd/Egill Bjarni Friðjónsson

Arnar Pétursson landsliðsþjálfari handknattleik kvenna hefur gert eina breytingu á landsliðshópnum sem mætir Serbum í undankeppni Evrópumótsins á morgun frá viðureigninni við Svía ytra á miðvikudagskvöld. Aldís Ásta Heimisdóttir, KA/Þór var kölluð inn í hópinn í stað Lovísu Thompson úr Val.


Lovísa fékk högg á augabrún í leiknum við Svía á miðvikudagskvöld í Eskilstuna og getur ekki verið með.


Aldís Ásta er nýliði í landsliðinu og leikur þar af leiðandi sinn fyrsta landsleik á morgun ef að líkum lætur. Hún tók þátt í æfingu íslenska landsliðsins á Ásvöllum í dag reyndar eins og Ásdís Guðmundsdóttir, KA/Þór, sem einnig var valinn í æfingahóp landsliðsins á dögunum en fór ekki með til Svíþjóðar í vikunni.


Viðureign Íslands og Serbíu í 6. riðli undankeppni EM hefst klukkan 16 á morgun og fer fram í Schenkerhöllinni á Ásvöllum. Frítt verður inn á leikinn í boði Arionbanka.

- Auglýsing -

Nýjustu fréttir

- Auglýsing -