Mynd/ J.L.Long

Flest bendir til þess að æfingar og keppni í handknattleik falli niður næstu tvær vikur hið minnsta, ef marka má viðtal við Víði Reynisson yfirlögregluþjón í hádegisfréttum Bylgjunnar fyrir stundu.

Þar sagði Víðir að í undirbúningi væru tillögur hjá Þórólfi Guðnasyni sóttvarnalækni um herða verulega aðgerðir gegn kór­ónu­veirunni á höfuðborg­ar­svæðinu til að sporna við útbreiðslu kórónuveirunnar. Alls greindust 99 með veiruna í gær og hafa ekki verið fleiri síðan í mars. Ástandið er metið sem svo að veiran sé í veldisvexti. Þess vegna þykir ástæða til að bregðast við með að setja höfuðborgarsvæðið nánast í sóttkví eins og það leggur sig.

Meðal tillagna eða tilmæla sóttvaralæknis mun vera að íþróttafélög á höfuðborgarsvæðinu geri hlé á æfingum og keppni meðal barna, unglinga og fullorðinna næstu vikur.

Upplýsingafundur almannavarna verður haldinn klukkan 15 í dag. Á fundinum mun væntanlega verða nánar skýrt frá þeim hertu reglum og tilmælum sem standa fyrir dyrum, m.a. þeim sem munu snúa að íþróttahreyfingunni.

Ekki náðist í Róbert Geir Gíslason, framkvæmdastjóra Handknattleikssambands Íslands, við gerð fréttarinnar.

- Auglýsing -

Nýjustu fréttir

- Auglýsing -