- Auglýsing -
Kvennalið ÍBV dróst í gær á móti gríska liðinu AEP Panorama í 32-liða úrslitum Evrópubikarkeppninnar í handknattleik. Eftir vaska framgöngu og sigur á öðru grísku liði, PAOK, í Þessalóníku um síðustu helgi í 2. umferð keppninnar reiknuðu leikmenn ÍBV og þjálfari vart með því að dragast aftur á móti liði frá Þessalóníku í næstu umferð. Sú varð hinsvegar raunin.
- AEP Panorama er einnig með bækistöðvar í Þessalóníku og það sem meira er að liðið lék báða leiki sína í annarri umferð Evrópubikarkeppninnar um síðustu helgi í sama keppnishúsi og ÍBV og PAOK. Til viðbótar fóru leikir AEP Panorama fram nánast í kjölfarið á viðureignum ÍBV og PAOK.
- AEP Panorama tekur að þessu sinni þátt í Evrópukeppni í fyrsta sinn. Liðið vann Azeryol HC frá Aserbaídsjan samtals með 12 marka mun í leikjunum tveimur í annarri umferð. Panorama vann fyrri leikinn örugglega, 37:21, en tapaði þeim síðari, 27:23.
- Allir leikmenn AEP Panorama eru grískir að einum undanskildum sem er Albani.
- Þegar fjórar umferðir eru að baki í úrvalsdeild kvenna í Grikklandi er AEP Panorama í 7. sæti. PAOK sem ÍBV ruddi úr vegi í keppninni um síðustu helgi er í 3. sæti.
- PAOK vann AEP Panorama með 11 marka mun, 29:18, 25. september.
- Einn leikmaður AEP Panorama var í gríska landsliðinu sem mætti íslenska landsliðinu í forkeppni heimsmeistaramótsins í mars. Íslenska liðið vann leikinn örugglega, 31:19.
- Vilmar Þór Bjarnason, framkvæmdastjóri handknattleiksdeildar ÍBV, sagði við handbolta.is að ekki hafi náðst samband á milli félaganna ennþá. Þar af leiðandi væri of snemmt að ræða hvort báðir leikir liðanna fari fram á heimavelli annars hvors liðsins eða heima og að heiman. Verði síðari kosturinn valinn, þ.e. að leika heima og að heiman verður síðari viðureignin í Vestmannaeyjum 20. eða 21. nóvember og sá fyrri ytra viku fyrr.
- Auglýsing -
