Í annað sinn á viku hafa dómararnir Anton Gylfi Pálsson og Jónas Elíasson verið kallaðir til starfa í Meistaradeild Evrópu í handknattleik. Í kvöld verða þeir í eldlínunni í Álaborg þar sem dönsku meistararnir Aalborg Håndbold taka á móti þýska meistaraliðinu THW Kiel í áttundu umferð A-riðils.
Leikurinn hefst í Álaborg kl. 18.45 og geta áhugasamir vafalaust fylgst með frammistöðu þeirra á ehftv.
Fleiri Íslendingar koma við sögu í leiknum í kvöld því Aron Pálmarsson er leikmaður Aalborg Håndbold og Arnór Atlason er aðstoðarþjálfari liðsins.
Í síðustu viku voru þeir félagar í Szeged í Ungverjalandi og héldu uppi röð og reglu í viðureign Pick Szeged og Vardar. Um sögulegan leik var að ræða því um var að ræða síðasta heimaleik Pick Szeged í hinni sögufrægu keppnishöll Újszegedi Sportcsarnok sem þjónað hefur félaginu frá 1974.
Ný keppnishöll, Pick Arena, sem rúmar 8.300 áhorfendur í sæti verður tekin í notkun 9. desember þegar Pick Szeged tekur á móti THW Kiel í Meistaradeildinni. Pick Arena verður einnig keppnisstaður á EM karla í handknattleik sem hefst 13. janúar.
Ekki er útilokað að Anton og Jónas dæmi leiki á EM í nýju höllinni í Szeged þar sem þeir verða dómarar á mótinu.
