Aron heldur áfram að skrifa söguna

Aron Pálmarsson, leikmaður Barcelona. Ljósmynd/FC Barcelona

Aron Pálmarsson heldur áfram að skrifa söguna í Meistaradeild karla í handknattleik í dag þegar hann tekur þátt í leik Barcelona og PSG í undanúrslitum Meistaradeildar karla í handknattleik í Köln. Aron verður þar með fyrsti handknattleiksmaðurinn í sögunni til þess að taka þátt í “úrslitahelgi” Meistaradeildarinnar í níunda sinn.

Til dagsins í dag hafa Aron og fyrrverandi samherji hans hjá ungverska liðinu Veszprém og þýska meistaraliðinu Kiel, Momir Ilic, tekið þátt í undanúrslita,- og úrslitaleikjum Meistaradeildar í átta skipti.


Einu árin sem Aron hefur misst úr eftir að hann fór til Kiel frá FH sumarið 2009 var 2011 þegar Kiel komst ekki í undanúrslit og sjö árum síðar þegar Barcelona náði ekki inn í undanúrslit keppninnar.


Eins og áður sagði hefur Momir Ilic tekið þátt átta sinnum. Hann lagði skóna á hilluna vorið 2019.


Eftirtaldir leikmenn hafa náð að taka sjö sinnum þátt í undanúrslitum og úrslitum Meistaradeildar:
Joan Cañellas, Kiel, Vardar, Ciudad Real, Atlético Madrid.
Ivan Cupic, Rhein-Neckar Löwen, Kielce, Vardar.
Laszlo Nágy, Barcelona, Veszprém.
Chema Rodriguez, Ciudad Real, Atlético Madrid, Veszprém.
Arpad Strebik, Ciudad Real, Atlético Madrid, Barcelona, Vardar, Veszprém.
Victor Tomás, Barcelona.

- Auglýsing -

Nýjustu fréttir

- Auglýsing -